Category - Business Management

Posted on - 2020-10-09 12:13:42

ဝန်ဆောင်မှုကောင်းမွန်မှုအတွက် သတိပြုဆောင်ရွက်သင့်သောအချက်များ

Description

'----------'

စီးပွားရေးလုပ်ငန်းတွေအနေနဲ့ ဖောက်သည်တွေကို ကောင်းမွန်တဲ့ ဝန်ဆောင်မှုကို ရေရှည်တသမတ်တည်း ပေးနိုင်အောင် လုပ်ဆောင်ဖို့ဆိုတာ အလွန်ခက်တဲ့အရာပါ။ ဆိုင်တစ်ခုတည်းကိုပဲ ဝင်လာတဲ့ ဈေးဝယ် ၂- ယောက်ဟာ ဝန်ဆောင်မှုပေးသူ တစ်ဦးတည်းဆီကပဲ ကွဲပြားခြားနားတဲ့ ဝန်ဆောင်မှု အတွေ့အကြုံတွေကို ရသွားနိုင်ပါတယ်။ ဒါကြောင့် ဝန်ဆောင်မှုလုပ်ငန်းတွေအနေနဲ့ ကိုယ့်ရဲ့ ဖောက်သည်တွေ ကျေနပ်အောင် ဆောင်ရွက်သင့်တဲ့ အချက်တွေကို သိထားသင့်ပါတယ်။

၁။ ဈေးဝယ်သူတွေဟာ အမြဲတမ်းမမှန်ကန်နိုင်ပါဘူး။
ဈေးဝယ်သူသာ အမြဲမှန်တယ်ဆိုတဲ့ အယူအဆဟာ လက်တွေ့လုပ်ငန်းခွင်မှာတော့ အကောင်းဆုံး အတွေးအခေါ်မဟုတ်ပါဘူး။ ဥပမာ - ဖောက်သည်က တမင်မှားယွင်းလုပ်ဆောင်လိုက်တာ သို့မဟုတ် တမင်ပြဿနာရှာပြီး ရိုင်းပြတာမျိုးတွေ ဖြစ်နိုင်ပါတယ်။ အချို့ဖောက်သည်တွေဟာ သူတို့ကိုယ်တိုင်က ပြဿနာတွေကို ဖန်တီးတတ်ကြသူတွေ ဖြစ်ပါတယ်။ ဒါကြောင့် ဝန်ထမ်းတွေဟာ ကိုယ်ဖြေရှင်းပေးနိုင်တဲ့ ပြဿနာနဲ့ ဖြေရှင်းမပေးနိုင်တဲ့ ပြဿနာကို ကောင်းကောင်းခွဲခြား သိနေနိုင်ဖို့ လိုပါတယ်။ ဒါမှသာ ပြဿနာရှာတတ်တဲ့ ဖောက်သည်မျိုးနဲ့ တွေ့တဲ့အခါ အဆုံးသတ် ရလဒ်က ကောင်းမွန်မှာ ဖြစ်ပါတယ်။ နိုင်ထက်စီးနင်းလုပ်ချင်တဲ့ ဖောက်သည် တစ်ယောက်ရှိတာဟာ တခြားဖောက်သည်တွေကို အထင်လွဲစေတဲ့အပြင် ဝန်ထမ်းတွေကိုပါ စိတ်ဓာတ် ကျစေနိုင်တာကြောင့် ကိုယ့်လုပ်ငန်းကို အများကြီးထိခိုက်စေနိုင်တာကြောင့် ရှောင်ရှားနိုင်ဖို့ကြိုးစားပါ။

၂။ ဝန်ထမ်းတွေရဲ့ အမြင်နဲ့ လုပ်ငန်းရဲ့အမြင် မျှတညီညွတ်အောင် ညှိနှိုင်းပါ။
ဖောက်သည်တွေနဲ့ ဆက်ဆံတဲ့ နေရာမှာ ဝန်ထမ်းနဲ့ လုပ်ငန်းအမြင်မတူရင် သုံးဦးစလုံး နစ်နာပါတယ်။ ဖောက်သည်လည်း ဝန်ဆောင်မှု ကောင်းကောင်းမရ၊ လုပ်ငန်းလည်း စီးပွားထိခိုက်ပြီး ဝန်ထမ်းအနေနဲ့ အလုပ်နေရာ ဆုံးရှုံးသွားနိုင်ပါတယ်။ ဒါကြောင့် အလုပ်ကိုလေးစားမယ့် ဝန်ထမ်းမျိုးကိုပဲခန့်ပါ။ ရှိရမယ့် အရေးကြီးတဲ့ ကိုယ်ရည်ကိုယ်သွေးတွေကို တိတိကျကျ သတ်မှတ်ထားပါ။ အလုပ်ခန့်အပ်ပြီးရင်တော့ လုပ်ငန်းရဲ့ မူဝါဒတွေကို ဝန်ထမ်းတွေ စွဲမြဲရှင်းလင်းသွားအောင် စည်းရုံးဟောပြောရပါမယ်။ ဆုံးဖြတ်ချက်ချတဲ့အခါမှာ ပါဝင်ခွင့်ရှိခြင်းနဲ့ ဒီလုပ်ငန်းရဲ့ အကျိုးအမြတ်အချို့ကို ခံစားခွင့်ရစေခြင်းတွေဟာလည်း ဝန်ထမ်းတွေကို လုပ်ငန်းရဲ့ ပေါ်လစီတွေအပေါ် ပိုမိုနားလည်စေပြီး နဂိုက စောဒကတက်ချင်မယ့် အချက်တွေကိုတောင် လိုက်နာချင်စိတ် ရှိလာစေပါတယ်။ ဆုပေးတာ ကော်မရှင်ပေးတာတွေဟာ ဝန်ထမ်းတွေ အလုပ်လုပ်ချင်စိတ်ဖြစ်အောင် နှိုးဆော်ပေးနိုင်ပေမယ့် အခြားဆိုးကျိုးတွေကိုလည်း ဖြစ်ပေါ်စေနိုင်တာကြောင့် ဆုပေးမယ် ဆိုရင်လည်း တစ်ဦးချင်းစီထက် အဖွဲ့လိုက် ပေးတာမျိုးကို ပိုလုပ်သင့်ပါတယ်။

၃။ ဝန်ထမ်းတွေကို ဖြေရှင်းရခက်တဲ့အနေအထား မရောက်အောင် ကာကွယ်ပေးပါ။
အချို့ကိစ္စတွေမှာ ဝန်ထမ်းဟာ ဖောက်သည်ကို ကူညီချင်ပေမယ့် လုပ်ငန်းစည်းကမ်းနဲ့ ငြိနေတဲ့အခါ တာဝန်ကျေပွန်ဖို့ ကြိုးစားရင်းနဲ့ ဖောက်သည်ကို အလေးမထားသလိုမျိုး ဖြစ်သွားတတ်ပါတယ်။ ဒီလိုမဖြစ်အောင် ဝန်ထမ်းတွေကို ပြဿနာဖြေရှင်းနိုင်ခွင့်ပေးပါ။ ဒါပေမယ့်လည်း ဖောက်သည်တွေ အဆင်မပြေဖြစ်စေမယ့် မူဝါဒတွေ ချမှတ်ထားမိတာကြောင့် ဖြစ်ပေါ်လာတဲ့ ပြဿနာတွေကို ဝန်ထမ်းကိုပဲဖြေရှင်းခိုင်းတာမျိုး တတ်နိုင်သမျှ ရှောင်ကြဉ်ပါ။ ဝန်ထမ်းတွေကို သေချာစောင့်ကြည့်ခြင်းဟာ မန်နေဂျာအတွက် ဝန်ထမ်းတွေရဲ့ ဖောက်သည်အပေါ် တုန့်ပြန်မှုတွေကို ထိန်းသိမ်းပေးဖို့ အခွင့်အရေး ရစေတဲ့အပြင် ပြဿနာဖြေရှင်းနည်းတွေကိုပါ ပြသရာရောက်စေပါတယ်။ အထက်ပိုင်းအဆင့်အကြီးအကဲတွေဟာ ကိုယ့်လက်အောက် မန်နေဂျာတွေ တင်ပြသမျှကိုပဲ ကျေနပ်နေမယ့် အစား ဝန်ထမ်းတွေနဲ့ ဖောက်သည်တွေဆီက တုံ့ပြန်မှုတွေကို ပိုမိုနားထောင်သင့်ပါတယ်။

၄။ ဝန်ထမ်းတွေ မကျေမနပ်ဖြစ်စေတဲ့ ကိစ္စရပ်မျိုးတွေကို ကြိုတင်သိရှိနေအောင် ပြုလုပ်ထားပါ။
အောင်မြင်တဲ့ လုပ်ငန်းဖြစ်ချင်ရင် ဝန်ထမ်းတွေအတွက် အလုပ်ကို ခက်အောင်ပြုလုပ်မယ့်အစား လွယ်ကူအောင် စီစဉ်နိုင်ရပါတယ်။ ဒါမှသာ ဝန်ထမ်းတွေကလည်း ဖောက်သည်တွေ ကျေနပ်ပျော်ရွှင်အောင် ဝန်ဆောင်ပေးနိုင်မှာပါ။ ကိုယ့်ရဲ့လုပ်ကိုင်ပုံ စနစ်တွေမှာ ဘာမှားယွင်းနေလဲ ဆိုတာကို သေသေချာချာ တိတိကျကျ ရှာဖွေပြီး ပြဿနာကို ထိပ်တိုက်ရင်ဆိုင်ပါ။ လုပ်ငန်းရဲ့ မလိုအပ်ဘဲ ရှုပ်ထွေးပြီးအဆင်မပြေတဲ့ မူဝါဒတွေကြောင့် အခက်တွေ့နေတဲ့ ဖောက်သည်ကို ကျေနပ် ပျော်ရွှင်သွားအောင် လုပ်ဖို့ဆိုတာ မဖြစ်နိုင်ပါဘူး။ ဖောက်သည်တွေကို ဝန်ဆောင်မှုပေးတဲ့ နေရာမှာ ထားရှိတဲ့ ရည်မှန်းချက်ပန်းတိုင်တွေကို ဝန်ထမ်းတွေလည်း သိအောင် ဝေမျှပြောပြထားပါ။ လုပ်ငန်းခွင်မှာ အနိုင်ကျင့်တတ်တဲ့ စူပါဗိုက်ဆာ တွေ ဒါမှမဟုတ် မပြုံးမရွှင်ဖြစ်နေတဲ့ ဝန်ထမ်းတွေ၊ ပြဿနာ အမြဲရှာတတ်တဲ့ ဝန်ထမ်းတွေကို စောင့်ကြည့် လေ့လာပြီး ဖယ်ရှားပစ်သင့်ပါတယ်။

၅။ အခြားသူတွေထက် သာလွန်ကောင်းမွန်တဲ့ ဝန်ဆောင်မှုမျိုးပေးတဲ့ အလေ့အကျင့်ကို ပျိုးထောင်ပါ။
အလုပ်ခွင်ထဲမှာ သာမန်အဆင့်နဲ့ပဲ ကျေနပ်တတ်ကြတဲ့ ဝန်ထမ်းတွေဟာ သူတို့ကိုယ်သူတို့ ဝန်ဆောင်မှု ညံ့နေမှန်း မသိကြပါဘူး။ ဒါကြောင့် ကြုံလာမှ ပြောဆိုနေတာမျိုးမဟုတ်ဘဲ ကောင်းမွန်တဲ့ ဝန်ဆောင်မှုအကြောင်းကို ဝန်ထမ်းတွေ စိတ်ထဲစွဲမြဲနေဖို့ လိုအပ်တဲ့အတွက် လုပ်ငန်းရဲ့ ဓလေ့ထုံးစံတွေ၊ အခြေခံစည်းမျဉ်းတွေကို ရိုးရှင်းပြီး နားလည် လွယ်အောင် သတ်မှတ်ထားသင့်ပါတယ်။ ဝန်ထမ်းတွေဟာ သတ်မှတ်ထားတဲ့ လုပ်ထုံးစည်းမျဉ်းတွေ အသက်ဝင်အောင်လည်း ပန်းတိုင်ထားပြီး ဆောင်ရွက်နိုင်တဲ့ အသင်းတစ်ခုလိုမျိုး စည်းလုံးနေအောင် ကြိုးစားသင့်ပါတယ်။

၆။ ဝန်ထမ်းတွေကို အရေးကြီးတဲ့ ကိစ္စတွေမှာ ပိုပြီး အာရုံစိုက်နိုင်အောင် ကူညီပေးပါ။
ဝန်ထမ်းတစ်ယောက်ဟာ တစ်ကြိမ်မှာ အရေးကြီးတဲ့ အလုပ်တာဝန်တစ်ခုကိုပဲ အာရုံစိုက်ပြီးလုပ်ဆောင်ဖို့ လေ့ကျင့်ပေးပါ။ အဲ့ဒီအတွက်တော့ ဝန်ထမ်းအင်အားကို လုံလောက်အောင် ခန့်ထားပေးဖို့လိုမှာ ဖြစ်ပါတယ်။ အာရုံစိုက်ဖို့လိုအပ်တဲ့ အရေးကြီးကိစ္စတွေကို သတိပြုမိစေဖို့အတွက် လိုအပ်တဲ့ သတိပေးချက်တွေကို လုပ်ငန်းခွင်မှာ တပ်ဆင်ဖော်ပြ ထားသင့်ပါတယ်။ ဝန်ဆောင်မှုပေးရာမှာ အလေးပေး ဆောင်ရွက်ရမယ့် အစီအစဉ်တွေကို ရေးသားဖော်ပြထားပါ။ ဘယ်အရာတွေက အရေးကြီးဆုံးလဲ ဆိုတာကို ဝန်ထမ်းတစ်ယောက်က အလိုလို သဘောပေါက်နေပြီဆိုရင် မှန်ကန်တဲ့ အချိန်မှာ မှန်ကန်တဲ့ကိစ္စကို အာရုံစိုက်နိုင်တော့မှာ ဖြစ်ပါတယ်။

၇။ ဝန်ထမ်းတွေကို သူတို့ရဲ့ အခန်းကဏ္ဍကို သိမြင်နားလည်အောင် ရှင်းပြပေးပါ။
ဝန်ထမ်းတွေဟာ ဖောက်သည်ကို ဘာတွေဝန်ဆောင်မှုပေးရတယ် ဆိုတာထက် လုပ်ငန်းက ကိုယ့်ကိုဘာတွေခိုင်းတယ် ဆိုတာကိုပဲ အာရုံစိုက်နေလေ့ ရှိကြတာကြောင့် အဲ့ဒီအချက် နှစ်ချက်ကို ဝန်ထမ်းတွေ ကွဲကွဲပြားပြား သိမြင်စေဖို့အတွက်က အရေးကြီးပါတယ်။ ဒါကြောင့် လုပ်ငန်းရဲ့ ဝန်ဆောင်မှုနဲ့ ပတ်သက်တဲ့ ခံယူချက်တွေကို ဝန်ထမ်းရဲ့ တာဝန်တွေနဲ့ ကိုက်ညီချိန်ထိုးပြီး ရှင်းပြပေးပါ။ ဝန်ထမ်းတစ်ယောက်က သူဟာ လုပ်ငန်းရဲ့ မူဝါဒစာအုပ်ကြီး သက်သက်အတိုင်း လိုက်လုပ်နေရတာ မဟုတ်ဘဲ ဖောက်သည်စိတ်ချမ်းသာရေးအတွက် ကူညီပေးနေရတယ်လို့ သဘောပေါက်ထားဖို့ လိုပါတယ်။

၈။ ကိုယ်ချင်းစာနာစိတ် ရှိဖို့အတွက် လေ့ကျင့်သင်ကြားပေးပါ။
ဖောက်သည်တွေကို ကိုယ်ချင်းမစာနာတတ်တဲ့ ဝန်ထမ်းတစ်ယောက်ဟာ လုပ်ငန်းကို ထိခိုက်နိုင်တဲ့ ပြဿနာတွေကို ဖြေရှင်းနိုင်မှာ မဟုတ်ပါဘူး။ ဝန်ထမ်းတွေကို ဖောက်သည်တွေ ကြုံတွေ့သလို ကိုယ်ကိုယ်တိုင် ကြုံခဲ့ရတာမျိုးရှိခဲ့ရင် ဘယ်လိုခံစားရနိုင်မလဲ၊ ကိုယ့်ကို ဝန်ဆောင်မှုပေးတဲ့ ဝန်ထမ်းက ကိုယ့်ကို ဘယ်လိုဆက်ဆံစေချင်မလဲ ဆိုတာတွေကို တွေးကြည့်စေဖို့ လက်တွေ့သင်ခန်းစာလေးတွေ ပြုလုပ်ခိုင်းပါ။ ဘယ်လို အခြေအနေမျိုးတွေဟာ ဖောက်သည်တွေကို စိတ်ညစ်စေသလဲ ဆိုတာ ဝန်ထမ်းတွေကို ရှင်းပြထားပြီးတော့၊ အဲ့ဒီလိုအခြေအနေမျိုးကို ကြုံတွေ့လာတာနဲ့ ချက်ချင်း အဖြေရှာနိုင်မယ် ဆိုရင် နောက်ထပ်ပေါ်လာမယ့် ပြဿနာတွေကို ကြိုတင်ကာကွယ်ရာ ရောက်တဲ့အကြောင်း သင်ကြား ရှင်းပြထားပါ။

၉။ လုပ်ငန်းခွင်မှာ ကြုံတွေ့လာရတဲ့ စိတ်ပိုင်းဆိုင်ရာ ပြဿနာများကို ကိုယ်တိုင်ကိုင်တွယ် ဖြေရှင်းတတ်စေဖို့ လေ့ကျင့်ပေးပါ။
“ဈေးဝယ်သူကို စိတ်မဆိုးပါနဲ့” ဆိုတဲ့ စကားဟာ လက်တွေ့မှာ အသုံးမဝင်ပါဘူး။ ဈေးဝယ်သူတစ်ယောက်က ဝန်ထမ်းရဲ့ မျက်နှာကိုကြည့်ပြီး ဒေါသတကြီးအော်ဟစ်တဲ့အခါ ဝန်ထမ်းက စိတ်ဆိုးမိမှာပဲ ဖြစ်ပါတယ်။ ဒါကြောင့် ဝန်ထမ်းတွေကို စိတ်ဆိုးနေရင်တောင်မှ ပြဿနာကို မှန်မှန်ကန်ကန် အဖြေရှာနိုင်ဖို့အတွက် လေ့ကျင့်ပေးဖို့ လိုပါတယ်။ ဖောက်သည်နဲ့ ပြဿနာ ဖြစ်ခဲ့တဲ့ ဝန်ထမ်းကို ချက်ချင်းအရေးယူ အပြစ်ပေးမယ့်အစား ပြဿနာရဲ့ အရင်းအမြစ်ကို အတူတက ွအဖြေရှာပြီး သင်ခန်းစာ ယူစရာတွေ အဖြစ်ပြောင်းလဲနိုင်ဖို့ ကြိုးစားသင့်ပါတယ်။

၁၀။ ကောင်းမွန်တဲ့ ဝန်ဆောင်မှုအတွက် အသုံးပြုရတဲ့ ကုန်ကျစရိတ်တွေကို ပြန်လည်စိစစ်ပါ။
ဖောက်သည်ကို အကောင်းဆုံးဝန်ဆောင်မှုပေးနိုင်ဖို့ ကုန်ကျရတဲ့ စရိတ်တွေဟာ လုပ်ငန်းရဲ့ အနာဂတ်အတွက် ရင်းနှီးမြှုပ်နှံမှုဖြစ်တယ်လို့ သဘောပေါက်ထားသင့်ပါတယ်။ ဝန်ဆောင်မှုကောင်းမွန်ခြင်းနှင့်အတူ မလိုအပ်တဲ့ စရိတ်တွေကိုလည်း လျော့ချနိုင်ဖို့ အတွက် လုပ်ငန်းဆောင်ရွက်ချက်တွေကို တစ်ကြိမ်တည်းနဲ့ မှန်ကန်အောင်လုပ်ဆောင်ပါ။ သေသေချာချာ မလေ့ကျင့်ပေးထားတဲ့ ဝန်ထမ်းတစ်ယောက်ကြောင့် လုပ်ငန်းခွင်မှာ မှားယွင်းသွားတာတွေကို ပြင်ဆင်ရမယ်ဆိုရင် ကုန်ကျစရိတ် များပြားမှာ ဖြစ်တဲ့အတွက် မူလကတည်းက ကျွမ်းကျင်အောင် လေ့ကျင့်သင်ကြားပေးရတဲ့ စရိတ်ကုန်ကျမှုမျိုးဟာ ထိုက်တန်တဲ့ ကုန်ကျစရိတ်ဖြစ်ပါတယ်။ လုပ်သားအင်အားကို လုံလောက်အောင် ထားရှိပါ။ ဝန်ဆောင်မှုလုပ်ငန်းတွေမှာ ဝန်ထမ်းအင်အား မလုံလောက်တာကြောင့် ဖောက်သည်တွေရဲ့ လိုအပ်ချက်တွေကို ဖြည့်ဆည်းဖို့ ပျက်ကွက်လေ့ရှိကြပါတယ်။ ဒါကြောင့် ဝန်ဆောင်မှုပေးတဲ့နေရာမှာ ရှိသင့်ရှိထိုက်တဲ့ ဝန်ထမ်းအင်အား ရှိနေဖို့အတွက် ဂရုပြုရမှာ ဖြစ်ပါတယ်။

ဒီနေ့ခေတ် ဝန်ဆောင်မှုလုပ်ငန်းတွေရဲ့ စီးပွားရေးနယ်ပယ်ဟာ သိပ်ကိုပြိုင်ဆိုင်မှုပြင်းထန်တဲ့ နယ်ပယ်တစ်ခုဖြစ်ပါတယ်။ ကိုယ့်လုပ်ငန်းရဲ့ လက်ရှိဖောက်သည်တွေနဲ့ စားသုံးသူအသစ်တွေကို ကျေနပ်အောင်လုပ်ဆောင်ဖို့က ကောင်းမွန်တဲ့ ဝန်ဆောင်မှုတွေကို တသမတ်တည်းပေးနိုင်ဖို့လိုအပ်ပါတယ်။ ဒါကြောင့် ဝန်ဆောင်မှုနဲ့ပတ်သက်နေတဲ့ လုပ်ငန်းတိုင်းရဲ့ ဝန်ထမ်းဖြစ်စေ အလုပ်ရှင်ဖြစ်စေ အထက်မှာဖော်ပြခဲ့တဲ့ အချက်တွေကို နားလည်သဘောပေါက်ထားပြီး လက်တွေ့ ကျင့်သုံးနိုင်မယ်ဆိုရင်တော့ လုပ်ငန်းအတွက် အောင်မြင်မှုတွေကို ရရှိနိုင်မှာ ဖြစ်ပါတယ်။ ကျေးဇူးတင်ပါတယ်ခင်ဗျ။

Service Failure

အောင်မြင်